Dreamer

« Previous—Next »

Ek Kahani “Mausi”

“MAUSI”
Aaj subah aankh khul gayee,raat mein jaldi so gaya thaa isliye. Waise bhi America mein niyam hi yeh hai ki aap jaldi so jaiye aur jaldi uth jaiye.Parantu main niyom mein bandhaa hua insaan nahee hoon is baat ka mujhe garv bhi hota hai aur kabhi malal aur kabhi jalan bhi.
Jaldi uthaa to Chai peene ki talab hui…..Hindustan se America aaye hue bas abhi 1 din hi to hua thaa.Chai ki adat kahan se jaati.
Anaayaas hi ek chitrapat sa mashtishk mein chalne laga………sab kuch dheere dheere kramshash…ghoomata jaa raha thaa.Wo pehlaa din REC Rourkela mein aur din ki shuruat karne ke liye “Chai” ek amrit si jaan parti.Hamaraa din bhi Chai se shuru hota aur Chai per hi kahatam.
Bas subah ho yaa shaam hum dost Mausi ki dukan per jaa baithatey aur chai ke glass le kar baatein……….Paisee nahee hote to Mausi bade pyar se kehti “Beta baad mein de dena”.Kuch apnaa pan thaa usme…..”Beta”….Kabhi Garmi ki Chuttiyon mein khana bhi wahin khaate thee…
Jindagi dheere dheere chalti jaa rahi thee…..kabhi raftaar kam hoti to kabhi bahut tej……
Ek baar Mausi se baat hi baat mein Ghar Baar ke baare mein pooch liya…….
bade hi sehaj bhav se Mausi ne kaha “Beta….ek Laraka hai aur ek Laraki….” maine kaha “Per Mausi koi bhi dikhataa nahee?”
Mausi ne phir usi saraltaa se kaha” Beta….Laraki Beauty parlour mein kaam karti hai….aur Aspataal mein bhi…isliyee din mein apney “booty palor” rehti hai aur raat mein aspataal mein rehti hai….bahut kaam hota hai naa beta…aur hum gareeb log hain…………” isse pehlee Mausi apni kahani suna paati maine baat ko kaat diya aur pooch baithaa “Mausi Tumhara Larkaa kahan hai?”
Abki baar kuch Mausi thora ruki jaisey soch rahi ho ki kya jawaab dein…phir kuch soch kar bol padi ” Larkaa to beta Cinema haal mein ticket bechataa hai…Hum log to gareeb hain……..”
Maine ek baar phir baat kaat di jaisee ki main keh raha hoon ki ‘Mausi apni ram kahani mat sunao’ larakpan bhi thaa… aur Engineering college ki hawa bhi.
Ek nasha saa thaa ki haan main engineer hoon…. aur yeh to bas Mausi hi hain…..aur ek soch si dimag mein baith gayee thee ki rehnaa to yahan chaar saal hi hai aur waisee bhi duniya mein bahut log gareeb hain kis kis kaa dukh sunoo aur kis kis kaa dukh door karoon.Bas apni jindagi jiye jao…
Samay ke saath saath mera 3rd year bhi aa gaya….par in kuch mahino mein ek badalav maine dekha Mausi ki dukan per ….. koi daru pee kar har samay wahin padaa rehtaa thaa….naa kuch boltaa naa hi kuch kehtaa…..haan Mausi usko le kar thora pareshaan jaroor rehti …………per kise Mausi ki parwaah thee…..hamein to ek aur saathi mil gaya Daru supply karnee ke liye….apni to chal nikali….Mausi ki dukan per ab Chai ke saath Daru bhi piyo aur Pilao…
Mausi sab dekhati par kuch kehti naa thi…shayad usko bhi khushi thee ki ‘chalo is nakara ke Chaltey chai to bikane lagi…..’
In 3 saalon mein Mausi ki dukan kafi badi ho gayee thee….par maine laraki ko aaj tak nahee dekhaa thaa….aur naa hi Larake baare mein jaaantee thee… aur kaun itana sochata bhi thaa apni hostel ki fast life ke chalte…Bas hamara naya saathi jiskaa naam hamane “Tulliram” rakhaa thaa…hamein daru deta aur kabhi hum usey daru dete……bas aisee hi yeh kram chaltaa raha…..
Ab hamaraa 4th aur aakhiri saal thaa…. idhar kuch dino se college kaa mahaul garam thaa…kyon ki kuch larake der raat ko bahar se aaate pakara gayee thee…. der raat mein bahar se…………baat kuch hajam nahee hoti,kyon ki college sabhi larake aksaar der raat tak bahar rehte thee aur khaa pee kar aatee thee.Kuch to thaa is mamalee mein….Jab thora pata kiya to maloom chala ki wo sab…………………….yeh samjhane ki jaroorat nahee hai ki kya hua……..
Phir wahi subah aur wahi chai ki dukan….is baar apnee ek dost jo ki raat wali ghatana mein shamil thaa ke saath gaya……is baar chai dene ek laraki bahar aayee….
laraki ne kaha” Mayee ki tabiyat kharaab hai…” aur laraki ne chai hamein pakraa di.
Hum chai pee kar uthey aur mera dost kuch jyadaa hi tej chalnee laga….karan poocha to pata chala ki yeh wahi laraki……Mera dimag sayein sayein karnee laga…Sannate goojane lage kano mein……”Mausi ki baat …Beauty Parlour….Asptaal…kya yeh sab jhoot hai…..main usey Mausi kehtaa raha aaj tak….nahee nahee itana badaa dhokhaa…ander kuch aur bahar se kuch….” Sab kuch to soch dala maine jitana bura soch saktaa thaa sab kuch….Ab yeh nishachay kar liya thaa ki ab us dukan per chai nahee piyongaa…isliye nahee ki chai gundi ho gayee yaa wo laraki ….. parantu ek soch thee ki “Mausi” kaise kahoongaa………..
Shaam hui aur sabhi dost ek baar phir usi taraf nikal pade aur is baar doosari chai ki dukan….aur Mausi ki dukan ki taraf aisee dekha jaisee ki keh raha hoon….dekho ab tumhe poochata bhi nahee…..Kuch hi der baad dekhata hoon 4-5 aadmi……kuch galiyaan……aur Mausi ki….dukan ab ek Khandahar ban chuki thee…..poochane per pata chala ki jameen kisi aur ki thee aur Mausi ne uskaa kiraya nahee diyaa thaa 1 saal se…………kyon ki jo paisee thee wo sab larake kaa ilaaj karane mein kharch ho gaye…. “larake kaa ilaaj….? Arey larakaa to khud hi kamataa hai….” doosare chai wale se maine kaha…..jawab aayaa arey kahan bhaiyaa…..kis duniyaa mein rehtee ho….main poocha”Kyon…?” phir se jawab “Jo aap logon ke saath daru peeta thaa naa wahi to iskaa larkaa thaa…. aur ab to wo Mar bhi gaya 1 saal ho gayee babu….” Is baar main phir soch mein pad gaya….”Mausi ne jhoot kyon kaha…..?” phir apney aap hi soch ne ek karwat li aur kuch samajh aanee laga ander chadhaa pardaa thoraa hatataa dikh raha thaa….”Aakhir Mausi bhi ek Maa thee usey bhi apnee parivar ko acchaa dekhana kaa hak hai….to kya hua agar wo GAREEB………..bas Gareeb…………haan Gareeb yahi to Mausi har baat ke baad kehti thee…….
jo main sunana nahee chahtaa thaa………….kisi naa kisi bahanee taal detaa thaa Mausi ki baat…..” Ab nafrat ki jagah glani ne leli thee……thora dukh bhi hua.
Achanak kuch jalane ki gandh se main soch se jaga aur chai kaa pani dekhane kitchen mein chal diya…..per under ek santosh thaa ……………… is baat kaa ki maine usey galat naam nahee diyaa thaa………jo ki Maa ke samaan thaa……………….MAUSI.
“Prateek”

 

No comments yet

Leave a Reply

Name

Mail (will not be published)

Website

Enter the following characters/numbers into the box below, please!